Mae'r galw am wasanaeth HelpwrArian wedi cynyddu 34% yn wythnos gyntaf 2024

• Mae pobl yn rhuthro i'r adran trafferthion arian wrth i'r Flwyddyn Newydd ddechrau.
• Mae ymwelwyr unigryw ac ymweliadau cyffredinol wedi cynyddu o draean, tra bod ymweliadau â thudalennau'n dyblu.
• Mae'n edrych yn debyg y bydd y cynnydd yn parhau trwy fis Ionawr, gyda chynnydd pellach eisoes wedi'i gofnodi.
• MaPS: “Mae pobl ar fin wynebu cyfnod anodd, ond mae’r ateb yn dechrau gyda’r cam cyntaf hwnnw.”

Cyrhaeddodd cyfanswm yr ymweliadau â thudalennau Trafferthion Arian HelpwrArian 10,187 yn ystod wythnos gyntaf Ionawr eleni, gan godi o 7,625 yn ystod yr wythnos hyd at Noswyl Nadolig.

Yn ystod Ionawr 1-7 hefyd fe wnaeth 8,924 o unigolion fewngofnodi i’r adran, cynnydd o 37% o’i gymharu â Rhagfyr 17-24, tra bu i ymweliadau tudalen bron â dyblu (48%) i 20,027 yn ystod y cyfnod hwnnw.

Mae HelpwrArian, gwasanaeth diduedd a gefnogir gan y Llywodraeth, yn cynnig cymorth ac arweiniad am ddim i unrhyw un sydd ei angen ar ystod eang o bynciau ariannol, gan gynnwys gwybodaeth, canllawiau a theclynnau fel rhan o’i adran Trafferthion Arian.

Y dudalen fwyaf poblogaidd yr ymwelwyd â hi o fewn y pwnc hwnnw oedd y teclyn lleolwr cyngor ar ddyledion, ac yna ‘Delio â dyled’ a ‘Help gyda Chostau Byw’.

Roedd cynnydd hefyd yn y defnydd o ‘delio â chymorth brys gydag arian a bwyd’ ac ‘delio â dyfarniadau llys gwlad (CCJs)’.

Roedd y termau chwilio mwyaf poblogaidd yn ystod y cyfnod hwn yn cynnwys “sgamiau”, “gorchymyn rhyddhau dyled” a “methdaliad”. Roedd “Lle i Anadlu”, cynllun sydd wedi’i gynllunio i roi amddiffyniadau cyfreithiol i bobl wrth iddynt gael cyngor ar ddyledion, hefyd yn ymddangos yn aml.

Mae’n edrych yn debyg y bydd y cynnydd yn y galw yn parhau ymhell i mewn i 2024. O’i gymharu â’r pythefnos yn arwain at Noswyl Nadolig (11/12 i 24/12), bu cynnydd o 23% yn nifer yr ymweliadau yn ystod pythefnos cyntaf Ionawr (21,466 o'i gymharu â 17,452).

Yn ogystal, bu cynnydd o 25% yng nghyfanswm yr ymwelwyr (18,384 o'i gymharu â 14,719) a chynnydd o 34% mewn ymweliadau â thudalennau (41,490 o'i gymharu â 30,917).

Mewn ymateb, dywed MaPS ei fod mewn sefyllfa dda i fodloni’r galw cynyddol ac mae’n annog pobl i fewngofnodi a dod o hyd i’r cymorth sydd ei angen arnynt.

Dywedodd Charlotte Jackson, Pennaeth Gwasanaethau Cyfarwyddyd y Gwasanaeth Arian a Phensiynau:

“Mae pobl ar hyd a lled y wlad ar fin wynebu cyfnod anodd eleni. Fel y dengys y ffigurau hyn, i lawer mae'r rhain eisoes wedi dechrau.

“Pan fydd pethau’n mynd yn anodd, mae angen i ni i gyd wybod bod yna rywle i droi. Os ydych yn poeni na allwch gael dau ben llinyn ynghyd, mae eich dyledion yn dechrau cynyddu neu os oes angen help arnoch gyda phenderfyniadau ariannol pwysig, rydym yn cynnig y man cyswllt cyntaf hwnnw.

“Mae ein gwasanaeth HelpwrArian am ddim yn cynnig canllawiau manwl, teclynnau pwrpasol a gwybodaeth am gymorth arbenigol fel y gallwch gael y cymorth sydd ei angen arnoch yn gyflym.

“Mae trafferthion ariannol yn effeithio’n negyddol ar eich bywyd mewn llawer o ffyrdd, ond mae’r ateb yn dechrau gyda’r cam cychwynnol hwnnw. Byddwn yn annog unrhyw un sydd mewn trafferthion i ddechrau’r daith honno heddiw.”

– DIWEDD –

Mae'r holl ffigurau'n cael eu casglu a'u cyhoeddi gan y Gwasanaeth Arian a Phensiynau.

Mae'r holl ffigurau wedi'u talgrynnu i'r 1 agosaf. Yn ystod y cyfrifiadau, defnyddiwyd y ffigwr canrannol i un lle degol.

Maent yn ymwneud â chyfanswm ymweliadau â'r adran trafferthion ariannolYn agor mewn ffenestr newydd