Nid yw tri o bob pedwar oedolyn yn y DU yn gwybod faint yw eu cyflog cymryd adref wrth dderbyn swydd

• Mae ffigurau newydd yn peri syndod am eu bod yn dangos nad yw y rhan fwyaf o weithwyr yn gwybod faint o arian y byddant yn ei ennill.
• Mae HelpwrArian wedi lansio cyfrifiannell cyflog am ddim i helpu pobl i wybod eu cyflog cymryd adref a chymharu cyflogau. 
• Mae miloedd wedi elwa o’r teclyn newydd ers ei lansio, gyda'r mwyafrif yn ennill llai na £30,000 y flwyddyn. 

Nid oedd bron i dri o bob pedwar gweithiwr (72%) a ddechreuodd eu swydd yn ystod y pum mlynedd diwethaf, yn gwybod eu union dâl cymryd adref* cyn dechrau eu swydd, mae ymchwil newydd gan y Gwasanaeth Arian a Phensiynau (MaPS) wedi datgelu.

Datgelwyd yr ystadegyn sy’n peri syndod fel rhan o arolwg newydd o fwy na 2,000 o oedolion, a ganfu, er bod bron i hanner y gweithwyr (44%) yn dweud mai cyflog yw'r unig beth neu'r prif beth maen nhw'n ei ystyried wrth ddewis swydd, dim ond chwarter (24%) oedd yn gwybod yn union faint o arian y byddent yn ei dderbyn yn eu cyfrif banc.

Er mwyn helpu pobl i wneud penderfyniadau mwy gwybodus, mae HelpwrArian, gwasanaeth arweiniad arian a phensiynau am ddim a diduedd, a weithredir gan MaPS, wedi lansio cyfrifiannell cyflog am ddimYn agor mewn ffenestr newydd sy'n dangos yr hyn y byddwch fel arfer yn ei ennill ar ôl treth, Yswiriant Gwladol a didyniadau eraill.

Mae'r teclyn newydd hefyd yn eich caniatáu i gymharu dau gyflog gwahanol ochr yn ochr, a all fod yn ddefnyddiol os ydych chi'n ystyried cynnig swydd, dyrchafiad, neu newid mewn oriau.  Yn ogystal, mae'n cyfeirio defnyddwyr i arweiniad ariannol pellach drwy HelpwrArian, gan gynnwys teclynnau cyllidebu, awgrymiadau cynilo, a chymorth budd-daliadau.

Meddai Anna Sharkey, Pennaeth Polisi a Chynigion Arian a Phensiynau yn y Gwasanaeth Arian a Phensiynau:

"Gall cyflogau pobl newid; p'un a yw'n dechrau swydd newydd, cael dyrchafiad neu ostwng eich oriau. Bydd y teclyn newydd hwn yn helpu pobl ym mhob cam o'u bywyd gwaith i ddeall faint y byddant yn cymryd adref ar ôl diwrnod caled o waith. 

"Mae mor bwysig bod pobl yn gwybod faint o arian maen nhw'n ei wneud mewn gwirionedd, yn hytrach na sut olwg sydd ar eu cyflog ar bapur. Dim ond ar ôl gwybod beth fyddwch chi'n cymryd adref y gallwch chi ddechrau cyllidebu a chynilo yn effeithiol." 

Mae'r gyfrifiannell am ddim, yn ddiduedd ac yn gyflym i'w defnyddio, gydag opsiynau datblygedig i archwilio'r effaith ar eich cyflog cymryd adref os ydych yn dechrau cyfraniadau pensiwn, gwneud ad-daliadau benthyciad myfyrwyr neu groesi oedran pensiwn y wladwriaeth.

Ers ei lansio fis diwethaf, mae'r teclyn wedi cael ei ddefnyddio dros 70,000 o weithiau, gyda mwy na hanner y defnyddwyr yn ennill llai na £30,000 y flwyddyn a thraean o dan £10,000, sy'n dangos ei werth i'r rhai sydd â'r incwm isaf.

I ddefnyddio'r teclyn am ddim ac i gael mwy o arweiniad arian a phensiynau diduedd, ewch i HelpwrArianYn agor mewn ffenestr newydd.

– DIWEDD  –

• Mae'r holl ffigurau, oni nodir yn wahanol, yn dod o YouGov Plc. 
• Cyfanswm maint y sampl oedd 2,130 o oedolion. O'r rhain, roedd 1,157 yn weithwyr, a dechreuodd 652 eu swydd yn ystod y pum mlynedd diwethaf.
• Cynhaliwyd gwaith maes rhwng 2 - 8 Ebrill 2026. 
• Cynhaliwyd yr arolwg ar-lein. 
• Mae'r ffigurau wedi'u pwysoli ac maent yn gynrychioliadol o holl oedolion y DU (18+ oed).
• Mae *Cyflog cymryd adref yn cyfeirio at y swm o gyflog sy'n cael ei dalu i'ch cyfrif banc bob mis ar ôl i'ch cyflogwr tynnu treth, Yswiriant Gwladol, a didyniadau eraill. O'r rhai a holwyd dim ond 24% oedd yn gwybod yr union ffigwr. Roedd gan 51% o'r ymatebwyr syniad bras o'u tâl cymryd adref, nid oedd 21% o'r rhai a holwyd yn gwybod, tra nad oedd 4% yn gallu cofio.
• O'r rhai a arolygwyd, roedd dros chwarter (27%) wedi bod yn eu swydd bresennol ers rhwng 3-5 mlynedd.
• O'r bobl hynny sy'n cael eu cyflogi, dywedodd mwy na hanner (54%) eu bod yn debygol iawn neu'n eithaf tebygol o ddefnyddio cyfrifiannell cyflog os oeddent yn ystyried swydd newydd. 

• Lansiwyd HelpwrArian ym mis Mehefin 2021 fel gwasanaeth sy'n wynebu defnyddwyr i gynnig arweiniad ariannol a phensiynau am ddim a diduedd.
• Mae'n dwyn ynghyd gefnogaeth a gwasanaethau tri chyn-ddarparwr canllawiau ariannol a gefnogir gan y llywodraeth: Y Gwasanaeth Cynghori Ariannol, Y Gwasanaeth Cynghori Pensiynau a Pension Wise.
• Mae HelpwrArian yn cynnig cymorth diduedd am ddim am arian a phensiynau sy'n gyflym i'w ddarganfod, yn hawdd i'w ddefnyddio ac wedi'i gefnogi gan y llywodraeth.
• Mae'r gwasanaeth yn cynnig arweiniad clir ar-lein, dros y ffôn ac wyneb yn wyneb a hefyd yn cyfeirio defnyddwyr at wasanaethau dibynadwy, os oes angen mwy o gefnogaeth arnynt.