Addysg ariannol i blant a phobl ifanc

Yn 2020, gwnaethom gyhoeddi Strategaeth y DU ar gyfer Lles Ariannol. Gosododd hyn nod cenedlaethol i ddwy filiwn yn fwy o blant a phobl ifanc dderbyn addysg ariannol ystyrlon erbyn 2030.

Rydym bellach yn cefnogi cynnydd tuag at y nod hwn mewn partneriaeth â'r llywodraeth, gwasanaethau ariannol, elusennau a phartneriaid eraill. Mae hyn yn cynnwys:

• adeiladu a rhannu tystiolaeth i lunio darpariaeth addysg ariannol, gan gynnwys rhaglenni ariannu i brofi dulliau ac ymyriadau newydd
• helpu i ddatblygu a hyrwyddo teclynnau a gwasanaethau addysg ariannol
• cynnal a chyfrannu at rwydweithiau sy'n cefnogi rhannu arferion gorau
• hyrwyddo addysg ariannol fel rhan o'n hymgyrchu cenedlaethol dros Wythnos Siarad Arian.

Mae ymchwil yn dangos bod y sgiliau, agweddau ac ymddygiadau sydd gennym am arian yn dechrau datblygu o oedran ifanc. Mae'r sgiliau hyn yn tyfu trwy gydol ein plentyndod a'n harddegau, felly gall addysg ariannol o oedran ifanc wneud gwahaniaeth enfawr i'n lles ariannol pan fyddwn yn oedolion.

Yn ystod y blynyddoedd diwethaf, rydym wedi dysgu:

• mae plant a phobl ifanc sy'n derbyn addysg ariannol ystyrlon yn fwy tebygol o fod yn gynilwyr gweithredol, bod ganddynt gyfrif banc maent yn ei ddefnyddio, a bod yn fwy hyderus wrth reoli arian
• dim ond hanner plant a phobl ifanc y DU sy'n derbyn addysg ariannol ystyrlon, naill ai gartref neu yn yr ysgol
• mae llawer o bobl ifanc yn troi’n oedolyn heb y wybodaeth a'r sgiliau sydd eu hangen i reoli eu harian, ac felly maent mewn perygl o ganlyniadau ariannol gwael.

Gallwch weld mwy o fewnwelediadau sy'n dangos effaith addysg ariannol yn ein tudalennau ymchwil.

Rydym yn canolbwyntio ar addysg ariannol mewn tri amgylchedd allweddol.

Mae rhieni a gofalwyr yn chwarae rhan hanfodol mewn addysg ariannol plant. Fodd bynnag, dim ond 56% ohonynt sy'n teimlo'n hyderus yn siarad â'u plant am arian.

Trwy ein gwefan HelpwrArian i ddefnyddwyr, rydym yn cynnig arweiniad i rieni a gofalwyr ar sut i siarad â phlant am arian, beth bynnag fo'u hoedran. Mae'r arweiniad hyn yn cynnwys awgrymiadau, syniadau a ffyrdd o gael plant i gymryd rhan mewn rheoli arian o ddydd i ddydd.

• Sut i siarad â'ch plentyn am arian
• Sut i siarad â'ch pobl ifanc am arian

Er bod llawer o arweinwyr addysg ac athrawon yn cydnabod pwysigrwydd addysg ariannol, dim ond traean o blant a phobl ifanc sy'n gallu cofio dysgu oedd yn ddefnyddiol am arian.

Gall athrawon ac addysgwyr ddefnyddio ein harweiniad ar gyfer ysgolion. Mae ganddo wybodaeth am ymgorffori addysg ariannol a datblygu gallu ariannol plant a phobl ifanc. Mae'n cynnwys:

• sut mae addysg ariannol yn cysylltu â'r cwricwlwm
• yn nodi sut y gall ysgolion wella'r addysg ariannol y maent yn ei darparu
• cyfeirio at wasanaethau ac adnoddau a all helpu.

Gallwch ddysgu mwy am sut rydym yn gweithio gydag eraill i helpu ysgolion i wella eu darpariaeth addysg ariannol.

Rydym yn gwybod bod rhai plant a phobl ifanc yn fwy tebygol o golli allan ar addysg ariannol neu fod â lefelau is o allu a lles ariannol.

Felly, mae'n bwysig bod gan y rhai sy'n gweithio gyda phobl ifanc sy’n agored i niwed yn y gymuned yr hyder, y wybodaeth a'r sgiliau i adeiladu dysgu am arian yn y gefnogaeth maen nhw'n ei ddarparu.

Gall arweinwyr gwasanaeth ac ymarferwyr sy'n gweithio yn y gymuned:

• Edrych ar ein canllawiau ar gyfer gwasanaethau plant a phobl ifanc sy'n cynnig gwybodaeth am arfer da wrth ddarparu addysg ariannol. Mae pedwar canllaw ar gael – un ar gyfer pob un o genhedloedd y DU.
• lawrlwytho’r pecyn cymorth i ymarferwyr, sy'n cynnwys adnoddau a gwasanaethau a all eich cefnogi wrth siarad â phobl ifanc am arian a darparu arweiniad ariannol anffurfiol
• cymryd rhan yn ein rhaglen Arweinwyr Arian, sy'n caniatáu i bobl sy'n gweithio gydag aelodau o'r cyhoedd wella eu sgiliau o ran arweiniad arian.

Nod ein rhaglen ymchwil flaenllaw yw adeiladu ein gwybodaeth am:

• les ariannol plant ledled y DU
• argaeledd addysg ariannol yn y DU, a
• beth sy'n gweithio wrth adeiladu gallu ariannol ar gyfer cenedlaethau'r dyfodol.

Rydym yn cynnal arolwg lles ariannol unigryw i blant a phobl ifanc. Mae hwn yn ddadansoddiad cynhwysfawr o allu ariannol plant a phobl ifanc, yn ogystal â'u profiadau o addysg ariannol gartref, yn yr ysgol ac yn y gymuned.

Gallwch ddarllen mwy am ein hymchwil.

Os oes gennych gwestiynau pellach, neu os hoffech ddeall mwy am ddarparu addysg ariannol yn eich gwaith eich hun, gallwch gysylltu â ni drwy e-bost yn [email protected]